risoluzione consigliata 1024 x 768
 
 
Mi presento
 
La mia Montagna
 
VAL MONTANAIA
 
FERRATA MERLONE
 
I miei racconti
 
Le mie poesie
 
PREMIO La Cometa
 
COLLI EUGANEI
 
CORALE T. ZAGGIA
 
GORGO NOVIZZA NEWS
 
SANTIAGO DI COMPOSTELA
 
  Contatti
 
  Links

 

MOEA EA' CAGNA
cicche per terra e motti di spirito con dialetto a gogò
 
 

 
I miei racconti
 
 
 
Letara a Piero
di Mario Berto
 
In dialetto padovano
   

 

Ciao Piero,
so qua che vardo fora dal vero.
Eà to caseta xe ancora in piè, proprio come che te'à ghe assà st'istà.
El to pra', tuto verde, xe pien de merli, seeghete, tortore e stornei. Sti osèi se da convegno ogni matina pa' becoeàre e ciaciaràr d'amore. I zuga, i se core drio, i fa i mati. Insoma tuti i versi che fa e creature inamorà. E ti e mi ne savèmo de sicuro calcossa, anca massa. Cossa vuto xe qua eà primavera, el soe scalda, i ormoni se sveja e, in te ogni creatura che sia on poco viva, se desmissia el morbìn. Queo bon, casso! Queo che perpetua el comandamento del Signore “crescete e moltiplicatevi” e che a mi piase da morire. Se te savessi, no so ti, ma mi cressarìa e me moltiplicaria ogni santo minuto. Cossa disito, massa morbìn?
Ah, voevo anca dirte che, ora su un àngoeo, ora su nantro del to prà, ghe xe sempre on gato che sta a vardare a oci sbarà. El fato xe, che sto gato, na volta el xe biso, na volta rosso, na volta bianco e na volta nero. Tanto che me domando come che'l fassa cambiar peo cussì in freta. A no vurìa pensar mae, sa credo ch'el sia on gato spia, on gato deà CIA mimetisà, porca miseria! Magari i xe drio copiarte el posso. Robe da mati, no se poe essare pi sicuri de gnente, Piero, staolta i te roba el posso! Opure, i poe essare anca quatro gati diversi, come quei deà banda deà “musica moderna, - composta de quatro gati, - che cantan come mati, - miao-miao, miao pfu.” E te savessi, l'ebete de Pluto come che ghe sbàia drio! Come che li varda in cagnesco. Pa forsa, ora ca ghe penso, on can miga poe vedare e robe in gatesco, casso! Dai Mario svèiate!

Cossa vuto Piero, xe che ieri so 'ndà cavarme ch'el poco de judissio che me restava. Be' te go da dire che'l jera proprio marso. Gheto capìo ben? No massa, ma del tuto marso! Marso anca massa! Soto i feri, po, na paura ca no te digo. Ansi prima che'l dotore ciapasse i atressi in man, ghe go dito:
“El sapia lu, che mi so qua volontario, ma che no'l creda lu, che mi sia pien de corajo!” E lù ridendo: “Gnente, no'l sentirà gnente sior Mario!” e intanto el me dixe de verzare eà boca, e mi... go sarà i oci. “El verza eà boca!” el me ripete pi forte. E mi, a oci sarà, no fasso ora verzare i àvari che lu me ga ficà dentro no so che roba. Sento on spunciòn e quasi me vien da morsegare, ma me tegno e moeo soeo on sigo guturae che no se capiva ben, ma che voeva dire:
“Ahi, ostrega! Te me ghe fato mae!”
Intanto el dotore va via, assandome eà, a boca verta. El torna dopo sinque o diese minuti e el me domanda:
“Siòr Mario, cossa sènteo in boca?” E mi:
“Dotore, me pare d'aver ciapà on stramusòn. So tuto intontìo, me pare che me sia cascà meza boca.”
“Bon cussì”, me risponde lù invitandome a verzare de novo eà boca. E intanto che mi verzèva i papari, saravo de novo i oci.
Pa on poco go sentìo trabatare in boca, spetando sempre el colpo del KO, invesse poco dopo el dotore me fa:
“Be' come va sior Mario?” e mi eà intontìo, a oci sarà e boca verta, fermo come na mumia, ca parevo tuto Chavez, no ghe rispondo. E lù de novo, come se'l gavesse ciapà paura deà me imobiità, me siga in te na recia, in italiano stavolta:
“Ehi, signor Mario, abbiamo finito!”
Mi me svejo de colpo e ghe digo:
“Dotore, tuto qua?” e lu, el dotore, de rimando me dixe:
“Be' se'l voe podemo cavarli tuti.”
“No,” ghe fasso mi, “jera ca spetavo de sentir mae!”

El beo, Piero, xe, ca no dovevo ndarghe jeri, che jera venare dal cerusico, ma zoba passà dovevo ndarghe. Cussì, co go verto eà porta del cavadenti, eà segretaria me ga vardà come sa fusse cascà da Marte e eà me ga dito:
“Ma signor Berto” in italiano eà meò ga dito, “noi l'aspettavamo ieri.” Mi so cascà dae nuvoe. On tonfo ca no te digo! E quea continua sempre in italiano s-cieto: “abbiamo pensato che ci avesse ripensato”. Aeòra mi, in mezo a tuto ch'el pensare ghe rispondo:
“Sacramento! Mi pensavo che ieri, fusse sta oncò.” e fin che me gratavo eà suca come eà Cita de Tarzan, quea me varda e scopia a ridare.

Peta Piero, miga eà xe finìa.
Dopo eà segretaria eà me dixe:
“Sa, signor Mario, ieri, per puro caso, si è presentato uno che si chiamava Berto Mario!” E mi:
“Ah sì? E par caso, ghe gavìo cavà el dente a ch'el Berto Mario la?” e quea de novo a ridare. Co eà ga finio de far versi eà me fa:
“No! L'ho guardato bene in viso e mi è parso un Berto Mario del tutto differente. Certo che la cosa mi ha stupito e sentir dire da quel signore “sono Berto Mario”, sono rimasta interdetta ed ho pensato a una burla.”

Ecco Piero, magari al posto mio, sarìa capità che i ghe gavesse cavà el giudissio a che'l Berto Mario là.
Prova soeo a imajnare e dime se no te vien da imbonessarte, on Berto Mario qualsiasi sensa dente del judissio pa puro caso e pa on caso de omonimia.
Pena casa, Piero, ghe go contà tuto el qui-pro-quo a eà Teresa, xe mancà poco che eà se pissasse dosso dal ridare. Eà me ga dito:
“Tute a ti e capita?” e mi:
“Sì cara, no sta darte meraveja! Pensa che tra e man, te me si capità anca ti.”
Insoma, Piero, fora che schei, pal resto me capita de tuto, tanto da tegnere me mojere sempre in ansia. Mi no me stufo de ripetarghe che eò fasso pal so ben, che cussì a ghe tegno el core in susta, se no el se fermarìa prima. No so se eà me creda, anca parchè ogni volta eà me manda a far benedire. Robe che se davero ghe dasse reta, sarìa sempre a fare eà fia in cesa al Santo.
Piero, tirate su co eà vita, parchè penso che co pi vecio ca devento, pi te ne go da contare.
Ciao, daghe on baso a eà Milieta che oncò xe anca eà so festa. Ciao Vecio, stame ben.

Mario

 

   
© 2015 elaborazione grafica by pitbaldr - testi by libor
anno 10° . aggiornamento n. 1